Pasuokumi
Kasgadejuos svineibys, kuramuos teik atzeimuota Storptautyskuo muzeju dīna, nūteik Grodnis Vaļsts viesturis i arheologejis muzejā. Atškireibā nu cytu muzeju Boltkrīvejā, kas pīduovoj viņ „Muzeju dīnu” ci „Muzeju nakti”, myusu muzejs ir vīneigais, kas pīduovoj projektu „Muzeja dīna i nakts”. Apmaklātuojim ir īspieja redzēt i muzeja ekspozicejis, i ari izstuodis, kas ir reikuotys tymā laikā, ari pīsadaleit pasuocīņūs, kas nūteik Vacajā i Jaunajā pilī.
Programys leluokais nūtykums beja 2008. g. slavu ceinis muokslys kluba „Aridan” izruode i simfoniskuo orkestra koncertprograma dirigenta Barisa Mjagkova „Just Jazz” vadeibā. 2009. g. vokora programys nūslāgumā tyka pīduovuots nūsavērt muzykalu kompoziceju Grodnis pedagogiskuos koledžys studentu izpiļdejumā, kas baļsteita iz Vēbera i Raisa rokoperys „Jezus Kristus – Superzvaigzne” sižeta. Luga „Makbeta tragedeja”, kuru 2010. g. īstudēja Grodnis Regionalais leļu teatris (vadeituojs i scenografs Aleks Žugžda), saguodoj patīsu prīcu skateituojim, kas varēja vāruot izruodis nūtykumus Lelkņaza Vītauta piļsdrupuos. Cytu godu muzejs organizēja svātkus ar nūsaukumu „Saviļņuojuma nūslāpumi”. Apmaklātuojim beja īspieja īsapazeit ar spieļu viesturi izruodis laikā, kas nūtyka viņ tymā vokorā; redzēt trikus, art body performaņcis; izzynuot, kai profesionals krupje dola spēlis kartys. Vokora programa 2012. g. saucēs „Viedekļa i reveransa nakts”, a 2013. g. skateituojim tyka pīduovuota programa ar nūsaukumu „Austrumu nakts Jaunajā pilī”.
Kab nūdrūsynuotu piec īspiejis plašuoku muzeja daleibu izgleiteibys procesā piļsātys i regiona školuos i kab veiduotu cīšys attīceibys ar jaunīšim, muzejs organizej vysaidus konkursus.
„Muzejs kruosuos” ir muokslys konkurss bārnim, kas vuicuos muokslys školuos, vyspuorizgleitojūšajuos školuos i klasēs, kas specializejās muokslā ci ari tim bārnim, kas apmeklej Grodnis uorpusškolys izgleiteibys centrus.
Myusu muzejs ir īsuocs jaunūs fotografu konkursu „Muzejs caur fotoaparata objektivu”, kura mierks ir pīsaisteit radūšūs jaunīšus myusu dīnu muzejam, ari paleidzēt jaunajim fotoamaterim atkluot sovu radūšū potencialu, atteisteit personiskuos spiejis i estetiskū gaumi. Uzvarātuoji pīsadola storptautiskajā konkursā „Muzeju tikšonuos”, kas nūteik Košalinā (Pūleja).
„Viesturis bolsi” ir regiona nūvodpietnīceibys konkurss 8.–10. klasis školānim i vysa regiona nūvodpietnīceibys pulceņu dalinīkim. Jis teik organizāts kūpā ar Grodnis turisma i nūvodpietnīceibys centru.
2014. g. martā tyka izsludynuots muokslinīku meistareibys konkurss „Belets iz muzeju”. Itymā konkursā varēja pīsadaleit dizaineri, muokslinīki i vīnkuorši radūši, izdūmys boguoti i talanteigi cylvāki, kuri ir sasnīguši 18 godu vacumu i kuri grib paraudzeit radeit naaizmierstamu, spūdru i interesantu īejis beletu.
Pyrma pīsaskūt, Jaunuos piļs āka var tikt izmontuota svineigys lauleibu registracejis pasuocīņam. 17. g. s. Karaliskuo piļs ir naparosta vīta laulobom. Jau nazcik godu symtu piļs sīnys ir līcinīki nūzeimeigim viesturiskim nūtykumim. Myusu dīnuos Karaliskuos Rezideņcis durs ir attaiseitys vysim meilys puorim, kas grib apvīnuot sovus liktiņus Juos Majestatis Stanislava Augusta Poņatovska apartamentūs. Gostus sveicynoj Karaliskuos Rezideņcis dyžciļteigī saiminīki, i piļs iņterjers padora itaidu lauleibu registracejis ceremoneju vēļ cyldonuoku, svineiguoku i atmiņā palīkūšu.
Muzeja darbinīki ir izstruodovuši scenareju pasuocīņam „Dzimšonys dīna muzejā”, kas dūmuots bārnim nu 6 da 10 godu vacuma.
Boltkrīvejis nacionalūs kulturu festivala ītvorūs parosti nūteik atkluošonys dīnys, kod improvizāti Leitovys i Pūlejis pogolmi teik izvītuoti Vacuos i Jaunuos piļs teritorejā. Tī var klauseitīs vysaidu pošdarbeibys kolektivu muzyku i vērtīs izruodis, īsaguoduot tautys muokslinīku i meistaru dorbus, ari nūbaudeit nacionalūs iedīņus.
Treis reizis godā nūteik izstuode-godatiergs „Duorgumu pasauļs”, kur var sajimt konsultacejis i īsaguoduot vysaidus izstruoduojumus nu sudobra, nikeļa, dabeigim pusduorgakminim, dekorativuo akmiņa, kūka i cytim materialim.
Muzejs reikoj vysaidys konfereņcis, prezentacejis, koncertus, literarus i muzykys vokorus, kas veļteiti svareiguokajim viesturis, kulturys i literaturys nūtykumim i paruodeibom sabīdreibā. 2011. g. Maksima Bagdanoviča sātā i cytuos Grodnis regiona kulturys i izgleiteibys īstuodēs tyka organizāti eipaši pasuocīni, kab atzeimuotu Boltkrīvejis literaturys klasikys 120. godadīnu. 2013. g. oktobrī Jaunajā pilī nūtyka konfereņce „Grodņa Stefana Batoreja laikā”, kas beja veļteita Leitovys Lelhercoga i Pūlejis Karaļa 480. godadīnai.
Muzejs ceņšās īkļaut sovuos aktivitatēs i izgleitojūšys, i izklaidejūšys dorba formys, kas varātu interesēt turistu grupys nu Boltkrīvejis, Krīvejis, Pūlejis, Leitovys, Vuocejis i cytu vaļstu.