Par myus

  • Rēzeknis Augstškolys (RA) dzimšonys dīna ir 1993. g. 1. julī.
  • RA izveiduota iz Latvejis Universitatis i Reigys Tehniskuos Universitatis bazis, tok augstuokuos izgleiteibys tradicejis Rēzeknē ir nu Latvejis breivvaļsts laika (1918–1940), kod Rēzeknē suoce dorbuotīs Pedagogiskuo škola (1922), piečuok Rēzeknis Vaļsts školuotuoju instituts (1925–1944).
  • Studejūšūs skaits 1993./1994. st. g. – 547, 2013./2014. st. g. – 1818
  • Darbinīku skaits 1993./1994. st. g. – 134, nu jūs akademiskais personals – 81, 2013./2014. st. g. – 258, nu jūs akademiskais personals – 148.
  • RA struktura: 4 fakultatis – Ekonomikys i vadeibys, Humanitarūs i juridiskūs zynuotņu, Inžinerzynuotņu (dybynuotys 1993. g.), Izgleiteibys i dizaina (izveiduota 1995. g., restrukturizejūt Rēzeknis Pedagogiskū školu), 2 iņstituti: Personeibys socializacejis pietejumu iņstituts i Regionalistikys zynuotniskais iņstituts (dybynuoti 2006. g.), centri, laboratorejis i cytys apkalpojūšuos strukturvīneibys.
  • 2013./2014. st. g. – 38 studeju programys: 21 pamatstudeju, 15 augstuokuo leimiņa, 3 doktora.
  • Absolventu skaits iz 2013. g. – 9293.
  • RA ir vaira kai 150 sadarbeibys partneri uorzemēs; augsti studejūšūs i akademiskuo personala mobilitatis ruodeituoji (videji 2.–3. vīta storp vysom Latvejis augstškolom).

RA darbeibys mierkis ir dūt studentim zynuotnis atteisteibys leiminim i Latvejis kulturys tradicejom atbylstūšu, Eiropys izgleiteibys telpā konkurētspiejeigu akademiskū i profesionalū augstuokū izgleiteibu, atteisteit kulturu, zynuotni i izgleiteibu Latgolys regionā i leidz ar tū vysā Latvejā. Kab nūskaidruotu atteisteibys perspektivys, RA īsasaista vysu svareiguokūs strategiskūs dokumentu sagatavē: „Latgolys programys 2007.–2017. godam” i „Latgolys strategejis 2030” izstruoduošonā.

Pasalelynojūt regionalūs augstškolu lūmai Latvejis i Eiropys Savīneibys koņtekstā, ir svareigi radeit zynuotniski aktivu vidi sevkurā regionā. Latgolys regionā deļ juo socialūs i viesturiskūs sovpateibu atsarūn da šuo moz izmontuots polihronisks goreigūs i materialūs vierteibu masivs. Tuo aktualiziešona, kas eipaši aktivizāta ar latgalistikys konfereņču tradicejom, ļaun apjaust i rysynuot taidus humanitarajuos i socialajuos zynuotnēs aktualus diskursus, pīvadumam, kulturys kontinuitate, polihronisms, teritorialuo ideņtitate, regionalistika, vītejūs resursu izmontuošona i. c. Studejūšī aktivi pīsadola kai konfereņču organiziešonā, apgiustūt nūsaceitys administriešonys prasmis, tai ari prezeņtej sovus pietejumus kai potencialī zynuotnīki, attīceiguos nūzares specialisti.

RA ir byutiska lūma regiona ilgtspiejeigā atteisteibā, kas ir cīši saisteita ar pošvaļdeibu atteisteibys perspektivu, kab sekmātu vīnmiereigu, policentrisku regionu atteisteibu Latvejis i ES mārūgā, rysynojūt pīrūbeža regionam soveigys problemys i dūmojūt par ES uorejuo rūbeža pīviļceibys palelynuošonys i cylvākresursu saglobuošonys pasuokumim.