Паштоўка чорна-белая, на ёй змешчана выява набярэжнай уздоўж правага берага р.Волгі ў Кіраўскім раёне горада Яраслаўля. На першым плане – выява ракі і прыстані, на другім - альтанкі. Асноўныя будаўнічыя працы на набярэжнай Волгі былі скончаны ў 1835 г., а ў 1840 г. тут была пабудавана круглая альтанка, выкананая ў стылі позняга класіцызму з цэглы і белага каменя.

з чэрвеня 1908 г. да лета 1916 г. беларускі паэт М.Багдановіч жыў у Яраслаўлі, вучыўся ў яраслаўскім Дзямідаўскім юрыдычным ліцэі, супрацоўнічаў з яраслаўскай газетай “Голос”, шмат пісаў, друкаваўся ў розных расійскіх і беларускіх выданнях, набываў вядомасць. У той перыяд былі напісаны вершаваныя лірычныя апавяданні «Ў вёсцы» і «Вэроніка», зроблены пераклады на беларускую мову вершаў Авідзія, Гарацыя, французскага паэта Поля Верлена. Апрача таго, у гэты перыяд Максім Багдановіч займаўся распрацоўкай канцэпцыі гісторыі развіцця беларускай літаратуры ад старажытнасці да пачатку ХХ ст. Гэта знайшло адлюстраванне ў артыкулах: «Глыбы і слаі» (надрукаваным у «Нашай Ніве»), «Кароткая гісторыя беларускай пісьменнасці да ХVІ сталецця», «За сто лет. Нарыс гісторыі беларускай пісьменнасці» і «Новый период в истории белорусской литературы».

Available on exposure	так
Collection	Літаратурна-грамадскі рух на Беларусі ў кан.ХІХ-пач. ХХ стст.