Muzejpedagogiskuos programmys
Interaktivys, izgleitojūšys nūdarbeibys pyrmškolys, suokumškolys, pamatškolys i vydsškolys školānim, studentim, atseviškys programys ari pīaugušūs auditorejai. LKM pīduovuojumā itamā šaļtī ir 17 muzejpedagogiskuos programys. Daudzys nu jūs daīmamys vysa goda garumā, cytys nūsaceitā mienesī, saskaņā ar školu vuiceibu programu voi viesturiskūs nūtykumu atceri nūsaceitā mienesī, datumā. Nūdarbeibys ilgums 40–60 minutu.
Muola pikuča pīdzeivuojumi
I lelim, i mozim dūta īspieja breinumainam ceļuojumam Latgolys keramikys vaļsteibā, sajiutūt, saklausūt muola breineiguos puormejis, i paraugūt pošim, kai puorsamej muola pyka peileitē, suneitī voi začeitī. Programa pīmāruota ari vuojredzeigim i naredzeigim apmaklātuojim.
24 stuņdis latgalīts
10.–12. klašu školāni i studenti izsekuos latgalīšu dzeivis rytmam 24 stuņžu garumā, īpazeis tradicejis, sadzeivis pīrodumus, gūdus, iedīņus, vuiceisīs senejūs latgalīšu vuordus, sajiutūt latgaliskū sevī i ap sevi.
Kai tūp maize?
Improvizāta maizis radeišonys procesa izspēle, īpazeistūt cepšonys tradicejis, cepšonā lītuotūs senejūs saimisteibys traukus. Īsapazeišona ar video vuiceibu materialu „Nu gryuda da maizis kukuļa” (2013), kas atainoj maizis ceļu – gryudu siešonu, labeibys augšonu, kuļšonu, gryudu maļšonu, maizis cepšonys tradicejis Latgolā, maizis degustiešona i čaja dzeršona.
Senejuos rūtalis i spēlis
Pyrmsškolys i suokumškolys vacuma bārni pasavērs kaitu viesturi, praktiski dorbuosīs, taisūt lītenis, ari spēleis aizmierstuos babenis laiku kusteiguos rūtalis.
Pa „Myužeiguo kalindera” pādim aba gleitraksteišona ar spolvu i tiņti
19. g. s. školys nūskanis, praktiski paraugūt senejū latgalīšu raksteibu ar spolvu i tiņti, īspieja sajimt dzeivis gudreibys nu Andryva Jūrdža „Myužeiguo kalindera”, īpazeit senejuos vuiceibu gruomotys.
Cylvāka bārns
Sirsneigais, ospruoteigais Bonifacejs Paulāns aba Boņuks februara mienesī uzrunoj školānus i studentus, prūtams, ar rakstnīka J. Klīdzieja romana „Cilvāka bārns” i kinorežisora J. Streiča taida poša nūsaukuma filmys paleidzeibu, partū ka taišni LKM atrūnamys lītys, kurys izmontuotys filmys taiseišonā, īskaitūt filmys scenareju.
Pyrmū reizi izstuodē
Školāni aicynuoti apmeklēt sevkuru muzejā asūšū muokslys izstuodi, deļtuo ka nūdarbeibys laikā bārni apgiust īmanis, kai vērtīs gleznu, skulpturu voi cytus muokslys dorbus. Nūdarbeibā paradzātys i sarunys, i praktiska dorbuošonuos – zeimiešona. Var nūtikt ari tikšonuos ar kaidu muokslinīku.
Tolka Latgolys sātā
Ir ražys tolkys, puotoru tolkys, molkys tolkys… Jaunuokūs klašu školāni īsajuss lauku sātys dorba rytmā saskaņā ar godalaikim i dobu, apsavērs muzeja kruojumā asūšūs dorbareikus, izspēlēs interaktivu spēli, īpazeistūt lauku dorbus, tradicejis latgalīšu sātā vysa goda garumā.
Daīmamys programys: „Latgolys atbreivuošonys pīmineklis – nu idejis da sirds”, „Latvejis breiveibys ceinis”, „Sasatikšonys Rūzis piļsātā”, „1991. gods – barikažu laiks”, „Pošim sova ābece”, „Dzeipareņa stuosts”, „Vyss par pīnu”, „Zemis dzilīnis nūslāpumi”, „Dzīd ciercineits aizkruosnē”.
Īprīškeja pīsasaceišona ( t.+371 64622464), aktualais pīduovuojums: www.for-skola.lv