Muola puormejis
Radūši izgleitojūša spēle „Muola puormejis” ļaus sevkuram byut par virtualu pūdnīku – muola pavieļnīku, izdzeivojūt muola puormeju ceļu nu juo sagataveišonys taiseišonai da izdadzynuota muola muokslys dorba. Sevkurs piec poša izvēlis varēs voi nu viņ taiseit muola traukus, voi ari paraleli trauka radeišonai izzynuot vysaidus interesantus faktus par pūdnīceibys omotu, juo specifiku.
Spēlis mierkis – palīkūt par virtualū pūdnīku i taisūt sovu muola trauku, īpazeit Latgolys pūdnīceibys omotu, juo pamatpriņcipus, izzynuot muola puormeju ceļu nu muola rakšonys muola kolnā da izdadzynuota muola trauka.
Spēlis natīšais mierkis – radeit interesi par LKM keramikys kolekcejis prīškmatim, Latgolys keramikys ekspoziceju, Latgolys pūdnīceibu kai vīnu nu Latvejis kulturys kanonu, pūdnīceibys tradiceju saglabuošonu i atteisteibu myusu dīnuos.
Spēlis adresats – školāni, studenti, pedagogi, eipaši tī, kuri studej i vuica muokslu, dizainu, kulturviesturi, tautys lītiškū muokslu; Latgolys keramikys i Latgolys kulturviesturis interesenti; turisti, kurus caur keramiku varātu īiņteresēt Latgolys regions, latgaliskuos vierteibys, tradicejis.
Spēlis aproksts
Spēle suocēs ar pošu pyrmū nūzeimeigū dorbu muola puormeju ceļā – muola rakšonu, kam sekoj muola meiceišona, vyrpuošona, rūtuošona, vuopiešona, cepļa kurynuošona, trauka izjimšona nu cepļa i pastuosteišona par sovu padareitū cytim.
Piec sevkura spālātuoja izvēlis trauka sataiseišonys ceļš var byut: 1) kai radūšs process, kurā spālātuojs (virtualais pūdnīks), sekojūt sūli pa sūļam kotrai cytai trauka taiseišonys fazei, dateik da poša sagataveita trauka; 2) trauka radeišona var byut radūši izzynūšs process, ka paraleli trauka veiduošonai spālātuojs īpazeis informaceju, kas paslāpta aiz ikonys I (informaceja), i izzynuos vysaidus interesantus faktus par muola rakšonu, vyrpuošonu, trauka kaļteišonu, vuopiešonu, cepļa kurynuošonu i c.
Sevkurs sataiseitais trauks pīsadola bolsuojumā par mieneša lobuokū trauku TOP 10. Kotra mieneša TOP 10 trauki tiks laseiti kūpā i veiduos spēlis „Muola puormejis” galereju. Sataiseituo trauka atveidu varēs syuteit draugim, īrokstūt jūs e-posta adresu, voi varēs īlikt socialajūs teiklūs, kab pastuosteitu cytim par sovu padareitū.
Palīkūt par virtualū pūdnīku, taisomūs trauku daudzums nav īrūbežuots. Cytu trauku gon var suokt gataveit viņ tod, kod piļneibā gotovs ir īprīškejais trauks voi sevkurā trauka radeišonys pūsmā atsagrīžūt spēlis suokumā.