Ekspedicejis
RA ekspedicejis teik organizātys studeju procesā i zynuotniskajā darbeibā. Studejūšī i docātuoji pīsadola ekologiskajuos, folklorys i geografiskajuos ekspedicejuos. Rešuok teik reikuotys ari arheologiskuos, mutvuordu viesturis, turisma i muzeja izbraukuma praksis i ekspedicejis.
Ekologiskuos ekspedicejis vidis inžinera programys studentim teik reikuotys nu 1997. goda.
Vidis inžineru programys ekologiskuos ekspedicejis pamatmierkis – pīsadaleit vidis kvalitatis kompleksā izpieteišonā apsekojamajā teritorejā, studentim apgiustūt apkuortejuos vidis kvalitatis pietejumu metodis lauka apstuokļūs.
Sevkuru godu ekspedicejā pīsadola 20–25 studejūšī, 5–6 docātuoji i pietnīki: http://studija.ru.lv/categories.php?cat_id=373&sessionid=d38020270e0c2c16cbf055f99a640742
Ekspedicejis aizdavumi:
- Apgiut zynuotniskuos aparaturys i miereišonys reiku lītuošonys prasmis i analižu jimšonys metodiku dobā.
- Nūjimt iudiņa, augsnis i gaisa kvalitatis ruodeituojus apsekojamajā teritorejā.
- Izdareit hidrometriskus mierejumus, nūsokūt azaru i upu dziļumu, straumis dreizumu, sataisūt upis škārsprofilu.
- Fiksēt ekspedicejis nūrisi i pietejamuos teritorijis ainavys foto i videomaterialūs.
- Ekspedicejis nūrisi i izdareitūs vidis nūvāruojumus seiki apraksteit nūvāruojumu žurnalā.
- Apgiut airiešonys tehniku, īsavuiceit vadeit laivu i puorsavītuot pa iudini ari ekstremalūs apstuokļūs, izbraucūt paradzātū maršrutu.
- Īsavuiceit dzeivuot cīšā saskarē ar dobu jai draudzeigā veidā.
- Apgiut prasmi struoduot grupā.
Byutiskuokī ekspedicejis rezultati teik izmontuoti studentu i docātuoju pietnīcyskūs dorbu izstruodē, verutīs iz vidis kvalitatis izmaiņom i ainavys transformacejom pietejamuos teritorejuos i akvatorejūs.
Folklorys ekspedicejis teik reikuotys filologejis programys studentim (nu 2002. goda), reizem jamuos pīsadola ari viesturis, tīseibu zinuotnis programu studejūšī.
Folklorys ekspedicejis pamatmierkis – vuiceit lītuot folklorys vuokšonys, pīraksteišonys, sistematiziešonys i analizis metodis praksē, veicynuot folklorys saglobuošonu i populariziešonu jaunīšu vidē.
Sevkuru godu ekspedicejā pīsadola 20–25 studejūšī, 5 docātuoji, pietnīki, teik aicynuoti ari folkloristi (sadarbeiba ar NVO: bīdreiba „Tautys muzykantu bīdreiba”, „ESTO”, vītejom folklorys kūpom i ansamblim). Folklorys ekspediceju gaita ir apsaverama foto galerejā: http://studija.ru.lv/categories.php?cat_id=369
Byutiskuokī ekspedicejis rezultati teik izmontuoti studentu i docātuoju pietnīcyskajūs dorbūs. Videji ekspedicejis laikā savuokts ap 1000 vysaidu žanru folklorys vīneibu.
Nu 2005. goda folklorys materiali ir īlykti ari RA sātys lopā http://folklora.ru.lv, dūdūt īspieju pietnīkim izmontuot myusu dīnuos aktualus folklorys materialus.
Nu 2009. goda ir izdūti DVD – bilingvali izzinis i vuiceibu materiali, īkļaunūt interesantuokūs i konkretajam pogostam soveiguokūs (autori: Šuplinska I., Justs M.):
„Cyblys meiklis” (2009).
Prezentacejis pasuokums: http://studija.ru.lv/categories.php?cat_id=269
„Aulejis anekdoti” (2010).
Prezentacejis pasuokums: http://studija.ru.lv/categories.php?cat_id=284
„Ondrupinis roksti” (2011)
„Kaunatys vītu vuordu stuosti” (2013)
Geografiskuos ekspedicejis teik reikuotys geografejis i socialūs zynuotņu školuotuoja programys studentim nu 2007. goda.
Geografejis i socialūs zynuotņu školoutuoja programys geografiskuos ekspedicejis pamatmierkis – realizēt praktikumu studeju kursam „Fiziskuos geografejis pamati”. Ekspedicejuos studenti papyldynoj sovys zynuošonys ari Latvejis dobys i regionalajā geografejā, īpazeist vysaidus dobys teritorialūs kompleksus i ainovys, nūvāroj antropogenys darbeibys sekys dabiskajā vidē.
Īpazeistūt Latvejis ainovu skaistumu i daudzveideibu, teik calts patriotisms i rūsynuota pozitiva emocionala attīksme pret dzymtū nūvodu i juo dobu.
Kotru godu ekspedicejā pīsadola 8–15 studejūšī, 4 docātuoji i pietnīki.
Byutiskuokī ekspedicejis rezultati teik izmontuoti studentu pietnīcyskajūs dorbūs, kai ari vidis pietnīceibys metožu i vidis izgleiteibys priņcipu īdzeivynuošonai pedagogiskajuos praksēs.