Par myus
Muzejs ir tei vīta Rēzeknē, kur sasateik viesturis olpa, stuosti par seņ paguojušim laikim i cylvākim ar myusu dīnu nūtykšonom i aktivitatem, kuruos pīdzeivuot koč kū nabejušu gaideits sevkurs.
Dybynuots 1959. g. kai Ludzys Nūvodpietnīceibys muzeja filiale i izvītuots ākā, kurā da Ūtruo pasauļa kara atsaroda Latgolys centralais muzejs. Nu 1960. g. muzejs dorbojās patstuoveigi kai Rēzeknis Nūvodpietnīceibys muzejs, paruodūt sovu pyrmū ekspoziceju apmaklātuojim.
Attīceigi kruojuma kolekceju raksturam i paplašynuotajam dorba saturam 1990. g. tyka puorsaukts par Latgolys Kulturviesturis muzeju (LKM). 1989. g. apmaklātuojim tyka attaiseita muzeja laseitova.
1996. g. Rēzeknis piļsātys pošvaļdeiba muzeja vajadzeibom nūdeve treju stuovu āku sūpluok muzeja centralajai ākai, kurā dorbu suoce LKM Izstuožu noms.
2010. g. ERAF i Rēzeknis piļsātys dūmis finansātā projektā nūtyka muzeja rekonstrukceja, kurys rezultatā puortaiseja bejušuo Izstuožu noma telpys i izcēle pībyuvi, kas savīnuoja muzeja viesturiskū āku i Izstuožu nomu vīnuotā LKM āku kompleksā. Piec rekonstrukcejis muzeja golvonais īgivums ir kruojuma globuošonai pīmāruotys telpys, izstuožu-konfereņču zale, apmaklātuoju zona, lifts, kas nūdrūsynoj muzeja daīmameibu cylvākim ar kusteibu trauciejumim, mamom ar bārnu ratenim.
LKM ir vaļsts akreditāta īstuode, kurys pamatfunkcejis i darbeibys specifika atrunuota misejā – LKM pastuov, kab ar muzejiskim leidzeklim veiduotu Rēzeknis kai Latgolys sirds tālu i ruodeitu juos viesturi nu pošu pyrmsuokumu da myusu dīnu, pieteitu kulturviesturis procesus Latgolā, tai rodūt interesi par nūvodu vysā sabīdreibā i veidojutīs par nūzeimeigu turisma objektu.
Nu 2013. g. LKM ir Rēzeknis pošvaļdeibys agenturys „Rēzeknis Kulturys i turisma centrs” strukturvīneiba. Muzejā nūteik materialuos i namaterialuos kulturys vierteibu vuokšona, pieteišona, saglobuošona i populariziešona izstuožu, tematisku pasuokumu, muzejpedagogisku nūdarbeibu, tikšonūs i c. aktivitašu veidā. Muzejā dorbojās 4 nūdalis – kruojuma, muokslys, kulturviesturis i saimisteibys.